Kobuldagi xususiy maktabda portlash sodir bo‘ldi, o‘quvchilar jarohatlandi
O‘quvchilar darslardan chiqqanidan keyin maktab hovlisiga granata otilgan
Afg‘oniston poytaxti Kobulning g‘arbiy qismidagi xususiy maktabda portlash sodir bo‘ldi. Hodisa oqibatida bir necha o‘quvchi, jumladan, bolalar jarohatlangan.
Portlash 17-avgust kuni mahalliy vaqt bilan soat 16:30 atrofida Kobulning 13-mavzesidagi Dasht-e-Barchi hududining Mahdia shaharchasida joylashgan “Sham-e-Hedayat” xususiy maktabida yuz bergan.
KabulNow nashriga ko‘ra, o‘quvchilar darslardan chiqqanidan keyin maktab qarshisidagi tor ko‘chadan uning hovlisiga granata otilgan. Portlash oqibatida bir necha kishi jarohatlangan, biroq ularning aniq soni hozircha ma’lum qilinmagan.
Jabrlanganlarning aksariyati yosh bolalar ekani, ular orasida qizlar va o‘g‘il bolalar ham borligi aytilmoqda. Jarohatlangan bir necha o‘quvchi shifoxonalarga olib ketilgan. Ularning ahvoli va jarohatlarining og‘irlik darajasi hozircha noma’lum.
Hodisa joyida tez yordam mashinalari ishlagani va jarohatlanganlarni shifoxonalarga olib ketgani aks etgan videolar ham tarqalgan.
Hozircha hech bir guruh portlash uchun javobgarlikni o‘z zimmasiga olmagan. Tolibon hukumati ham hodisa yuzasidan rasmiy izoh bermagan.
Portlash sodir bo‘lgan Dasht-e-Barchi Kobulning aholi zich joylashgan hududlaridan biri bo‘lib, bu yerda asosan shia hazoralar jamoasi istiqomat qiladi. Mazkur hudud avval ham jangari guruhlar, xususan, “Islomiy davlat”ning Afg‘onistondagi bo‘linmasi — ISIS-K tomonidan hujumlarga uchragan.
ISIS-K so‘nggi yillarda Afg‘onistonda hazora fuqarolariga qarshi qator hujumlarni amalga oshirgan. Guruh maktab, shifoxona, masjid, jamoat transporti va boshqa fuqarolik obyektlarini ham nishonga olgan.
