Qirg‘iziston va O‘zbekiston hududlarni almashish bo‘yicha keyingi qadamlarni kelishib oldi
Hududlarni almashish bo‘yicha kelishuvlarni amalga oshirish uchun qo‘shma ishchi guruh tuzdi. Guruh aholi fuqaroligi, ko‘chirish, mulkiy huquqlar, yerdan foydalanish va ijtimoiy himoya masalalarini hal qiladi.
Qirg‘iziston va O‘zbekiston yer maydonlarini almashish bo‘yicha avval erishilgan kelishuvlarni amalga oshirish yuzasidan keyingi amaliy qadamlarni belgilab oldi. Bu haqda 24.kg xabar berdi.
Bu masala Qirg‘izistonning Botken viloyati Qadamjoy tumanida bo‘lib o‘tgan ikki davlatning qo‘shma ishchi komissiyasi yig‘ilishida muhokama qilindi.
Yig‘ilishda almashinadigan hududlar aholisi fuqaroligi, ularni ko‘chirish, davlat mulki obyektlarini qabul qilish va topshirish, fuqarolarning mulkiy huquqlarini rasmiylashtirish, yerdan foydalanish hamda ijtimoiy himoya masalalari ko‘rib chiqildi.
Shuningdek, mazkur hududlar aholisi uchun ta’lim jarayonining uzluksizligini ta’minlash masalasiga ham e’tibor qaratildi.
Yig‘ilish yakunida ikki mamlakatning tegishli vazirlik va idoralari hamda mahalliy hokimiyat organlari vakillaridan iborat qo‘shma ishchi guruh tarkibi tasdiqlandi.
Ishchi guruh hududlarni almashish bilan bog‘liq masalalarni amaliy jihatdan hal etish bilan shug‘ullanadi. Uning vakillari ayirboshlanadigan hududlarga tashrif buyurib, amalga oshirilgan ishlar va natijalar haqida komissiya hamraislariga muntazam axborot taqdim etadi.
Qirg‘iziston tomonidan komissiyaga vazirning birinchi o‘rinbosari Kamchibek Dosmatov, O‘zbekiston tomonidan esa ichki ishlar vazirining birinchi o‘rinbosari B. B. Qudratxo‘jayev rahbarlik qilmoqda.
