Xivada Lyaonin pedagogika universiteti filiali ochildi

Prezident Shavkat Mirziyoyev Xiva shahrida tashkil etilgan Lyaonin pedagogika universitetining O‘zbekistondagi filiali hamda Konfutsiy instituti faoliyati bilan tanishdi.

 

 

Mamlakatda oliy ta’limni xalqaro standartlar asosida rivojlantirish, xorijiy nufuzli universitetlar bilan hamkorlikni kengaytirish va zamonaviy yo‘nalishlarda malakali kadrlar tayyorlashga alohida e’tibor qaratilmoqda.

 

Oliy ta’lim, fan va innovatsiyalar vazirligi, Abu Rayhon Beruniy nomidagi Urganch davlat universiteti hamda Xitoyning Lyaonin pedagogika universiteti hamkorligida yangi ta’lim majmuasi barpo etildi. 

 

 

Majmuani qurish va jihozlash uchun davlat budjetidan 140 milliard so‘m ajratilgan bo‘lib, bu yerda 120 ta yangi ish o‘rni yaratilgan.

 

Ta’lim majmuasida 560 o‘rinli o‘quv bloklari, kutubxona, sport zali, 200 o‘rinli madaniyat saroyi va 118 o‘rinli oshxona mavjud. Shuningdek, ikkinchi to‘rt qavatli binoda 628 o‘rinli auditoriyalar va 224 o‘rinli talabalar turar joyi tashkil etilgan.

 

 

2026-yil uchun filialga qabul kvotasi 160 nafar etib belgilangan. Kelgusida yillik qabulni 500 nafarga, talabalar sonini esa 2 ming nafarga yetkazish rejalashtirilmoqda.

 

Bu yerda ta’lim kunduzgi va masofaviy shakllarda, o‘zbek, xitoy va ingliz tillarida olib boriladi. Bakalavriat bosqichida xalqaro xitoy tili ta’limi, turizm boshqaruvi, xalqaro biznes va sun’iy intellekt yo‘nalishlari bo‘yicha kadrlar tayyorlanadi.

 

 

Magistratura bosqichida esa Xitoy tili va madaniyatini o‘qitish metodikasi, ta’lim boshqaruvi, shuningdek, sun’iy intellekt va ta’lim texnologiyalari yo‘nalishlari yo‘lga qo‘yilgan.

 

Filial diplomi O‘zbekistonda to‘g‘ridan-to‘g‘ri tan olinadi. Iqtidorli bitiruvchilarga Xitoyning yetakchi oliy ta’lim muassasalarida grant asosida o‘qishni davom ettirish hamda nufuzli tashkilotlarda stajirovka o‘tash imkoniyati yaratiladi.

 

Ayni paytda Xorazm viloyatida xitoylik investorlar ishtirokida umumiy qiymati 2 milliard 343 million dollarlik 38 ta yirik loyiha amalga oshirilmoqda. Mazkur loyihalarda zamonaviy texnologiyalarni yaxshi biladigan va xitoy tilini puxta egallagan malakali mutaxassislarga ehtiyoj yuqori.

 

 

Yangi ta’lim muassasasi va Konfutsiy instituti ana shu ehtiyojdan kelib chiqib, mehnat bozori talablariga mos kadrlar tayyorlashga xizmat qiladi.

 

Davlat rahbari ta’lim dasturlarini iqtisodiyot va mehnat bozori ehtiyojlari bilan uyg‘unlashtirish, talabalar zamonaviy texnologiyalar va xorijiy tillarni puxta egallashi uchun zarur sharoitlarni yaratish muhimligini ta’kidladi.

 

Tashrif davomida Prezidentga yagona milliy turizm platformasi hamda turizm sohasida tadbirkorlar uchun yaratilayotgan yangi imkoniyat va yengilliklar ham taqdimot qilindi.