Qozog‘istonda 19 yoshli o‘zbekistonlik kelin vafot etdi

Qozog‘istonning Jambil viloyati Merke tumanida 19 yoshli O‘zbekiston fuqarosi Madina Rashid qizining jasadi topildi. Uning o‘limi yuzasidan huquqni muhofaza qiluvchi organlar tomonidan tergov olib borilmoqda.

 

Qozog‘iston politsiyasi mazkur holat bo‘yicha o‘z joniga qasd qilishga undash moddasi bilan ish ochilganini ma’lum qilgan. Hozirda voqeaning barcha tafsilotlari aniqlanmoqda. Tergovga oid boshqa ma’lumotlar oshkor qilinmagan.

 

Mahalliy Qumash.kz nashrining yozishicha, Madina vafotidan oldin dugonasiga eri bilan munosabatlaridagi muammolar haqida gapirgan. U turmush o‘rtog‘i bilan tez-tez janjallashgani va uning tomonidan jismoniy zo‘ravonlikka uchraganini aytgan. Shuningdek, qiz eridan ketmoqchi bo‘lganini bildirgan.

 

Dugonasining so‘zlariga ko‘ra, Madina so‘nggi janjal haqida ham unga yozgan. Mojaro eri sakkiz oylik farzandi uchun olib kelgan “Barni” biskvitini Madina yeb qo‘ygani sababli yuzaga kelgan. Dugonasining ta’kidlashicha, shundan keyin erkak uni urgan.

 

Ertasi kuni Madina buyumlarini yig‘ib qo‘yganini ko‘rsatib, dugonasiga surat yuborgan va uydan ketmoqchi ekanini aytgan. 

 

Shuningdek, yo‘l xarajatlari uchun 15 ming tenge so‘ragan. Biroq dugonasi o‘sha paytda pul topa olmagan. Shundan keyin Madina bilan aloqa uzilgan. Keyinchalik uning qaynonasi dugonasiga Madinaning vafot etganini ma’lum qilgan.

 

Madina O‘zbekiston fuqarosi, uning eri esa Qozog‘iston fuqarosi bo‘lgan. Ular qariyb ikki yil avval turmush qurgan, sakkiz oylik farzandi bo'lgan. Dugonasining so‘zlariga ko‘ra, Madina homilador bo‘lishi ham mumkin edi.

 

Marhumaning dugonasi Madinaning o‘limi bilan bog‘liq holatlar yuzasidan shubhalar bildirgan. U qizning tanasida jarohatlar bo‘lganini aytib, voqeani to‘liq tekshirishga chaqirgan. Biroq bu ma’lumotlar hozircha rasman tasdiqlanmagan.

 

Politsiya tergov yakuniga qadar o‘lim sababi yoki muayyan shaxslarning aybdorligi haqida xulosa bermagan. Marhumaning yaqinlari esa uning o‘limi bilan bog‘liq barcha holatlar to‘liq va xolis aniqlanishini talab qilmoqda.