Xivada 12,3 gektarlik xalqaro turistik shaharcha barpo etiladi

Xiva shahrida tarixiy meros va zamonaviy shaharsozlik yechimlarini uyg‘unlashtirgan xalqaro turistik shaharcha barpo etilishi rejalashtirilmoqda. Prezident Shavkat Mirziyoyev shaharcha loyihasi taqdimoti bilan tanishdi.

 

Umumiy maydoni 12,3 gektar bo‘lgan majmuada mehmonxonalar, muzey, restoranlar, savdo va xizmat ko‘rsatish obyektlari joylashtiriladi. Muzeyda tarixiy va zamonaviy eksponatlar namoyish etilishi ko‘zda tutilgan.

 

Turistik shaharchaning me’moriy konsepsiyasi Xorazmning ko‘p asrlik shaharsozlik an’analari asosida ishlab chiqilgan. Jumladan, 1511-yilda Xiva xonligining ilk poytaxti bo‘lgan qadimiy Vazir shahrining tarixiy tuzilishi va ko‘chalar tarmog‘i konsepsiyaga asos qilib olingan.

 

Majmuaning salmoqli qismi yashil hududlar va sayr yo‘laklariga ajratiladi. Bu yerda sharsharali favvoralar va ichki ariqlar barpo etiladi. Avtoturargohlarda esa quyosh panellari o‘rnatilgan soyabonlar tashkil etilishi rejalashtirilgan.

 

Ma’lumotlarga ko‘ra, so‘nggi to‘qqiz yilda Xorazmda 280 ta mehmonxona va mehmon uyi qurilgan, mehmonxona fondi to‘rt barobar oshgan. So‘nggi besh yilda viloyatga tashrif buyurgan xorijiy sayyohlar soni esa 10 baravarga ko‘paygan.

 

Yangi turistik shaharcha Ichan-qal’aga tushayotgan turistik yuklamani kamaytirish, sayyohlar uchun yangi yo‘nalish va xizmatlarni taklif etish hamda ularning Xorazmda qolish muddatini uzaytirishga xizmat qiladi.

 

Loyiha doirasida minglab yangi ish o‘rinlari yaratish va aholi uchun avtomobillar harakatidan xoli yashil dam olish hududlarini tashkil etish ko‘zda tutilgan.