Xorazm viloyatida 176 million dollarlik 12 ta loyiha ishga tushirildi

Xorazm viloyatida umumiy qiymati 176 million dollar bo‘lgan 12 ta loyiha ishga tushirildi. Shuningdek, xorijiy hamkorlar ishtirokida qiymati 7 milliard 424 million dollarlik 15 ta yangi loyiha qurilishiga start berildi.

 

 

Yangi loyihalarni ishga tushirish marosimi 17-avgust kuni Xiva shahridagi “Farovon Khiva Hotel” mehmonxonasida Prezident Shavkat Mirziyoyev ishtirokida bo‘lib o‘tdi.

 

Tadbirda qayd etilishicha, so‘nggi to‘qqiz yil davomida Xorazm viloyatiga 7,5 milliard dollar investitsiya kiritilib, 9,7 mingta yangi quvvat ishga tushirilgan. Kichik va o‘rta biznes loyihalarini moliyalashtirish uchun 33 trillion so‘mdan ziyod kredit ajratilgan.

 

 

Natijada viloyatda aholining real daromadlari ikki baravar oshgan. Kambag‘allik darajasi 4,4 foizga, ishsizlik esa 4,5 foizga tushgan. 72 ta mahalla “ishsizlik va kambag‘allikdan holi” hududga aylangan. Viloyatda transport va turizm infratuzilmasini rivojlantirish bo‘yicha ham ishlar olib borilmoqda. 

 

So‘nggi to‘qqiz yilda 280 ta mehmonxona va mehmon uyi qurilgan, mehmonxona fondi to‘rt baravar oshgan. Oxirgi besh yilda Xorazmga tashrif buyurgan xorijiy sayyohlar soni esa 10 baravarga ko‘paygan.

 

 

Tadbirda 2026-yilda viloyatga jalb etilayotgan xorijiy investitsiyalar hajmi 2 milliard dollardan oshayotgani ta’kidlandi. Yil boshidan buyon Urganch va Xiva shaharlari, Tuproqqal’a hamda Urganch tumanlarida kimyo, mashinasozlik, qurilish materiallari va turizm yo‘nalishlaridagi loyihalar uchun zarur infratuzilma yaratilgan.

 

Shuningdek, Urganch xalqaro aeroportidan Xivagacha elektrlashtirilgan temir yo‘l liniyasi foydalanishga topshirildi. Urganch–Xiva pulli avtomobil yo‘li ham ishga tushirilmoqda. Mazkur yo‘l orqali Urganchdan Xivaga yetib borish vaqti 45 daqiqadan 20 daqiqagacha qisqarishi kutilmoqda.

 

 

Yangi loyihalar orasida Tuproqqal’a tumanida BAA hamkorligida 6 milliard dollarlik ekologik aviatsiya yoqilg‘isi ishlab chiqarish loyihasi, 170 million dollarlik bioetanol korxonasi, Urganch shahrida 30 million dollarlik mehmonxona va savdo-ko‘ngilochar majmuasi hamda Urganch tumanida 100 million dollarlik chiqindilarni qayta ishlash va 71 megavatt “yashil” energiya ishlab chiqarish loyihasi bor.

 

Bundan tashqari, Xiva yaqinida 120 million dollarlik “Sahro yulduzi” turistik majmuasi, Urganch tumanida 26 million dollarlik mis sanoati klasteri va 60 million dollarlik optik tolali kabellar ishlab chiqarish korxonasi tashkil etiladi.

 

 

Al-Xorazmiy shaharchasida 5 ming talabaga mo‘ljallangan universitet, mehmonxona, dam olish va savdo majmualari, Urganch shahrida esa “Investorlar uyi” qurilishi rejalashtirilgan. Loyihalar natijasida jami 6,6 mingta yangi ish o‘rni yaratilishi kutilmoqda.

 

Prezident Shavkat Mirziyoyev ramziy tugmani bosib, yangi loyihalarni ishga tushirdi va istiqboldagi loyihalar qurilishiga start berdi.