Prezident qarori asosida 50 ga yaqin bemorda murakkab operatsiyalar o‘tkazildi
Qurbon hayiti munosabati bilan tashkil etilgan xayriya tadbirlari doirasida bolalar va og‘ir tashxisli bemorlarga murakkab tibbiy yordam ko‘rsatildi.
O‘zbekistonda Qurbon hayiti munosabati bilan o‘tkazilayotgan mehr-saxovat tadbirlari doirasida 50 ga yaqin bemorda yuqori texnologik va murakkab jarrohlik amaliyotlari o‘tkazildi. Bu haqda Sog‘liqni saqlash vazirligi ma’lum qildi.
Qayd etilishicha, Prezidentning aholini davlat tomonidan qo‘llab-quvvatlash va mehr-saxovat tadbirlarini samarali tashkil etishga oid qarori asosida bir qator bemorlar davolanishga joylashtirilgan.
2026-yil 27-may soat 09:00 holatiga ko‘ra, 194 nafar bemor bola tibbiyot muassasalariga yotqizilgan bo‘lib, ularning 40 nafarida yuqori texnologik jarrohlik amaliyoti bajarilgan.
Shuningdek, onkologik, gematologik va onkogematologik tashxis qo‘yilgan 112 nafar bemor davolanishga joylashtirilgan. Ularning 5 nafarida murakkab jarrohlik operatsiyasi o‘tkazilgan.
Bundan tashqari, 14 nafar bemor tibbiyot muassasalariga yotqizilib, 2 nafarida jigar va buyrak transplantatsiyasi amalga oshirilgan.
