AQSH sudi Tramp nomini Kennedi markazidan olib tashlashga qaror qildi
Sud qaroriga ko‘ra, muassasa nomini Kongress roziligisiz o‘zgartirish mumkin emas. Markazning nomi 14 kun ichida avvalgi holatiga qaytarilishi kerak.
AQSHning Kolumbiya okrugi sudi Vashingtondagi Kennedi nomidagi Ijro san’atlari markazi nomidan Donald Tramp ismini olib tashlash haqida qaror chiqardi. Bu haqda BBC xabar berdi.
Sudya Kristofer Kuper qaroriga ko‘ra, markazning nomi 14 kun ichida avvalgi holatiga qaytarilishi kerak. Shuningdek, Tramp nomi binoning fasadi, barcha jismoniy va raqamli belgilar hamda rasmiy materiallardan olib tashlanadi.
Sud markazni 2026-yil 4-iyuldan boshlab ikki yil muddatga rekonstruksiya ishlari uchun yopish haqidagi qarorni ham to‘xtatdi.
Donald Tramp 2025-yilda markaz vasiylik kengashining bir qator a’zolarini almashtirib, o‘zini kengash tarkibiga kiritgan va keyinchalik uning raisi etib saylangan edi. O‘sha yil dekabr oyida boshqaruv kengashi muassasa nomini “Donald J. Tramp va Jon F. Kennedi nomidagi Ijro san’atlari memorial markazi” deb o‘zgartirishga qaror qilgan.
Biroq sud Kennedi markazi to‘g‘risidagi qonunchilikda muassasa Jon F. Kennedi xotirasiga bag‘ishlangan markaz sifatida belgilanganini ta’kidladi. Qarorda qayd etilishicha, markaz nomini o‘zgartirish vakolati faqat Kongressga tegishli.
“Kennedi markaziga nomni Kongress bergan va uni faqat Kongress o‘zgartirishi mumkin”, deyiladi sud qarorida.
Sud qaroriga muvofiq, markazning rasmiy nomi yana “Jon F. Kennedi nomidagi Ijro san’atlari memorial markazi”ga qaytariladi. Muassasa 1971-yilda AQSHning 1963-yilda suiqasd oqibatida halok bo‘lgan prezidenti Jon Kennedi xotirasiga bag‘ishlab ochilgan.
Markaz boshqaruvi vakillari qaror ustidan apellyatsiya berilishini ma’lum qildi. Muassasa matbuot kotibi Roma Daravining aytishicha, ular apellyatsiya sudi Trampning mamlakat madaniyat markaziga qo‘shgan hissasini e’tirof etish haqidagi kengash qarorini qo‘llab-quvvatlashiga ishonmoqda.
Donald Tramp esa ijtimoiy tarmoqdagi bayonotida Kongress bilan hamkorlikda muassasani qayta tiklash bo‘yicha ishlashini ma’lum qildi.
Mazkur mojaro bo‘yicha da’vo Ogayo shtatidan demokrat kongressmen Joys Bitti va bir guruh sobiq vasiylar tomonidan kiritilgan. Ular boshqaruv kengashi tarkibidagi o‘zgarishlar hamda markazni yopish rejalari qonunga zid ekanini ta’kidlagan edi.
