Shavkat Mirziyoyev “KIND” korporatsiyasi bosh ijrochi direktori bilan uchrashdi
Toshkentning yangi xalqaro aeroporti atrofidagi hududni rivojlantirish bo‘yicha master-reja ishlab chiqish masalasi muhokama qilindi.
O‘zbekiston Prezidenti Koreya Respublikasiga tashrifining ishbilarmonlik dasturi doirasida Koreyaning xorijiy infratuzilma va urbanizatsiyani qo‘llab-quvvatlash korporatsiyasi — “KIND” rahbari bilan muzokara o‘tkazdi.
Uchrashuvda O‘zbekiston transport va ijtimoiy infratuzilmasini rivojlantirish bo‘yicha hamkorlikni kengaytirish masalalari muhokama qilindi. Tomonlar qo‘shma investitsiya platformasi tashkil etilganini ijobiy baholadilar.
Shuningdek, yangi ilmiy-sanoat bioklasterini tashkil etish loyihasiga alohida e’tibor qaratildi. Unda ilm-fan, sanoat va zamonaviy texnologiyalarni yagona ekotizimga birlashtirish muhimligi ta’kidlandi.
Muloqot davomida Toshkentning yangi xalqaro aeroporti atrofidagi hududni rivojlantirish bo‘yicha master-reja ishlab chiqish masalasi ham ko‘rib chiqildi. Rejada aeroport, zamonaviy logistika xablari va turar joy infratuzilmasini o‘zaro bog‘langan yagona tizim sifatida rivojlantirish nazarda tutilishi qayd etildi.
