O‘zbekiston diplomi Yevropaga yo‘l ochadimi?
O‘zbekistonda oliy ta’lim dasturlarini xalqaro akkreditatsiyadan o‘tkazish ko‘lami kengaytiriladi.
O‘zbekistonda xalqaro akkreditatsiyadan o‘tgan oliy ta’lim dasturlari sonini 300 tadan oshirish rejalashtirilmoqda. Hozirda bu ko‘rsatkich 100 taga yaqin.
Bu haqda Abdulla Avloniy nomidagi pedagogik mahorat milliy institutida Portugaliyaning A3ES agentligi bilan hamkorlikda o‘tkazilgan «O‘zbekiston oliygohlarining Yevropa akkreditatsiyasi sari yo‘li» seminarida ma’lum qilindi.
Ta’lim sifatini ta’minlash milliy agentligi ma’lumotiga ko‘ra, O‘zbekistonda hozir 31 ta xorijiy akkreditatsiya tashkiloti reyestrga kiritilgan. Oliy ta’lim muassasalari ushbu tashkilotlardan akkreditatsiyadan o‘tishi mumkin va ularning natijalari milliy agentlik tomonidan tan olinadi.
O‘zbekiston Respublikasi Prezidenti Administratsiyasi huzuridagi Ta’lim sifatini ta’minlash milliy agentligi direktorining birinchi o‘rinbosari Nodir Ergashevning ta’kidlashicha, xalqaro akkreditatsiya va diplomni tan olish bir xil tushuncha emas.
Ya’ni xalqaro akkreditatsiya diplomning xorijda avtomatik tan olinishi degani emas. U, avvalo, ta’lim dasturining belgilangan xalqaro sifat talablariga javob berishini va bitiruvchining zarur bilim, ko‘nikma hamda kompetensiyalarni egallaganini tasdiqlaydi. Bu esa bitiruvchining xorijda o‘qishni davom ettirishi yoki ishga kirishi jarayonida uning malakasini baholashda muhim omil bo‘lishi mumkin.
Akkreditatsiya jarayonida universitetning faqat hujjatlari tekshirilmaydi. Talabalar, professor-o‘qituvchilar va ish beruvchilar o‘rtasida ham so‘rovlar o‘tkaziladi. Xususan, ish beruvchilarning talablari ta’lim dasturlarini shakllantirishda hisobga olinishi ko‘zda tutilgan. Ya’ni universitet bitiruvchida mehnat bozori talab qilayotgan kompetensiyalarni shakllantiryaptimi yoki yo‘qmi — shu jihat ham baholanadi.
Seminarda Portugaliyaning A3ES agentligi vakillari Yevropa oliy ta’lim hududida qo‘llaniladigan sifat kafolati yondashuvlari, institutsional va dasturiy akkreditatsiya hamda ekspertlar tomonidan baholash mexanizmlari bo‘yicha tajribasi bilan o‘rtoqlashdi.
Milliy agentlikning xalqaro akkreditatsiyani kengaytirish bo‘yicha 100 taga yaqin dasturdan 200 va undan keyin 300 dan ortiq dasturgacha chiqish maqsadi O‘zbekiston oliygohlarining xalqaro ta’lim maydonidagi tan olinishi va raqobatbardoshligini oshirishga qaratilgan.
