O‘zbekistonda dori vositalarini davlat ro‘yxatidan o‘tkazish bo‘yicha yangi talablar tasdiqlandi
Endilikda dori tarkibidagi GMO va hayvon xomashyosidan olingan moddalar haqida batafsil ma’lumot taqdim etilishi shart bo‘ladi.
Adliya vazirligida dori vositalarini davlat ro‘yxatidan o‘tkazish uchun taqdim etiladigan hujjatlarga qo‘yiladigan yangi talablarni belgilovchi yo‘riqnoma davlat ro‘yxatidan o‘tkazildi. Bu haqda “Huquqiy axborot” Telegram-kanali xabar berdi.
Mazkur hujjatga ko‘ra, dori vositalarini ro‘yxatdan o‘tkazish hujjatlari Inson uchun qo‘llaniladigan dori vositalariga qo‘yiladigan texnik talablarni uyg‘unlashtirish bo‘yicha xalqaro kengash standartlari asosida taqdim etiladi. Yangi tartib Vazirlar Mahkamasining 2025-yil 24-noyabrdagi 738-son qarori bilan tasdiqlangan nizom ijrosini ta’minlashga qaratilgan.
Yo‘riqnomaga muvofiq, agar dori vositasini ishlab chiqarishda hayvon xomashyosidan olingan moddalar qo‘llanilgan bo‘lsa, hujjatlarda ularning tarkibida prionlar mavjud yoki mavjud emasligi aniq ko‘rsatilishi shart.
Shuningdek, dori vositasini tibbiyotda qo‘llash bo‘yicha yo‘riqnomalarga xalqaro talablarga mos va reklama xususiyatiga ega bo‘lmagan qo‘shimcha ma’lumotlarni kiritishga ruxsat beriladi.
Yangi talablarga ko‘ra, dori vositasining genetik modifikatsiyalangan organizmlar (GMO) saqlashi yoki ulardan olinganligi haqidagi ma’lumotlar ham majburiy tartibda taqdim etiladi.
Bunda genetik modifikatsiya turi va manbasi, qo‘llangan genetik konstruksiya va ekspressiya tizimi, biologik hamda ekologik xavfsizlik choralari, ishlab chiqarish jarayonida GMOdan olingan moddalar qo‘llanilgan bosqichlar va genetik xavfsizlikka oid hujjatlar to‘g‘risidagi ma’lumotlar keltirilishi lozim.
