To‘qayev Putinni Ukrainadagi urushni "muzlatish"ga chaqirdi

Qozog‘iston prezidenti Qosim-Jo‘mart To‘qayev Omsk shahrida Rossiya prezidenti Vladimir Putin bilan o‘tkazilgan muzokaralarda Rossiya-Ukraina urushini "muzlatish" va tinchlik muzokaralarini qayta boshlash zarurligini ta’kidladi.

 

To‘qayevning aytishicha, unga AQSH va Yevropa davlatlaridan Rossiya hamda Ukraina o‘rtasidagi mojaro yuzasidan ko‘plab murojaatlar kelib tushmoqda va u bu haqda Putinni xabardor qilgan.

 

Qozog‘iston prezidenti mojaroning kelib chiqishini ko‘pchilik, jumladan Qozog‘iston uchun ham tushunish qiyinligini aytib, uni Ozarbayjon va Armaniston o‘rtasidagi tarixiy mojaro bilan taqqosladi.

 

Shuningdek, To‘qayev Putinning Alyaskada AQSH bilan o‘tkazilgan muzokaralarda "maksimal diplomatik moslashuvchanlik" namoyon etganini ta’kidladi.

 

Uning fikricha, mojaroni "muzlatish" va avval muhim natijalarga erishilgan "Istanbul formulasi 2.0"ga qaytish, shuningdek, Rossiya ham ishtirok etadigan yirik davlatlar kafolati ostida tinchlik sari harakat qilish maqsadga muvofiq.

 

To‘qayev urush oqibatida yoshlarning halok bo‘layotganini afsus bilan qayd etib, "Bularning barchasini to‘xtatish kerak", dedi. Uning ta’kidlashicha, davom etayotgan urush Rossiya va Ukraina raqiblari manfaatlariga xizmat qilmoqda. Putin esa uchrashuv davomida To‘qayevni "Ukraina yo‘nalishi"dagi vaziyat haqida batafsil xabardor qilishini ma’lum qildi.

 

Avvalroq Reuters agentligi Kremlga yaqin manbalarga tayanib, Vladimir Putin Ukraina bilan tinchlik muzokaralari bo‘yicha takliflarni rad etayotgani va Donetsk viloyatining qolgan qismini egallash masalasida murosasiz pozitsiyani saqlab qolayotgani haqida xabar bergandi.