Jizzaxda ayol qo‘shnisining bolasini kaltakladi
Holat yuzasidan rasmiy munosabat bildirildi.
Ijtimoiy tarmoqlarda Jizzax viloyatida ayolning voyaga yetmagan bolani kaltaklagani aytilgan video tarqaldi. Viloyat IIB holat yuzasidan munosabat bildirdi.
Qayd etilishicha, 2026-yil 19-iyun kuni Sharof Rashidov tumanida yashovchi fuqaro M.I. tuman IIBga murojaat qilib, 2015-yilda tug‘ilgan voyaga yetmagan farzandi mahalladoshi N.N. tomonidan haqorat qilinib, tan jarohati yetkazilganini bildirgan hamda qonuniy chora ko‘rishni so‘ragan.
Mazkur murojaat asosida tayinlangan sud-tibbiy ekspertiza xulosasiga ko‘ra, voyaga yetmagan bolada sog‘liqning buzilishiga olib kelmagan yengil tan jarohati aniqlangan.
Shuningdek, 2026-yil 20-iyun kuni fuqaro N.N. ham tuman IIBga murojaat qilib, ushbu voqea davomida uning voyaga yetmagan farzandlariga ham tan jarohati yetkazilganini ma’lum qilgan. Ushbu holat yuzasidan ham sud-tibbiy ekspertizasi tayinlangan.
Hozirda mazkur holat yuzasidan Sharof Rashidov tumani IIB tomonidan tergovga qadar tekshiruv olib borilmoqda. Yakuniga ko‘ra, qonunchilikda belgilangan tartibda huquqiy qaror qabul qilinishi bildirilgan.
