“Yagona QR-kod boshqa to‘lov usullarini bekor qilmaydi”: Soliq qo‘mitasi tushuntirish berdi
Qo‘mita tadbirkorlar boshqa to‘lov tashkilotlarining QR-kodlaridan foydalanishda davom etishi mumkinligini, soliq organlari esa bunga aralashish vakolatiga ega emasligini bildirdi.
2026-yil 1-iyuldan boshlab savdo va xizmat ko‘rsatish sohasidagi barcha yuridik shaxslar uchun yagona QR-kodli to‘lov tizimi orqali to‘lovlarni qabul qilish tartibi kuchga kirgan edi. Biroq bu to‘lovlar faqat yagona QR-kod orqali amalga oshirilishi kerak degani emas, deya ma’lum qilmoqda Soliq qo‘mitasi.
Qayd etilishicha, yagona QR-kod xaridorlar uchun mavjud to‘lov usullariga qo‘shimcha imkoniyat sifatida joriy etilgan. Shu sababli tadbirkorlar o‘z ixtiyoriga ko‘ra Davlat reyestriga kiritilgan to‘lov tashkilotlarining QR-kodlari, bank kartalari, naqd pul hamda qonunchilikda nazarda tutilgan boshqa to‘lov usullaridan ham foydalanishda davom etishi mumkin.
Rasmiy munosabatda Soliq qo‘mitasi hisob-kitoblarni amalga oshirish tartibini belgilovchi vakolatli organ emasligini ham alohida ta’kidlandi.
Shuningdek, Soliq qo‘mitasi soliq organlari tomonidan tadbirkorlarni boshqa to‘lov tashkilotlarining QR-kodlarini olib tashlashga majburlash yoki bu jarayonga aralashishga yo‘l qo‘yilmasligini bildirdi.
Agar soliq xodimlari tomonidan bunday noqonuniy holatlar kuzatilsa, tadbirkorlarga Soliq qo‘mitasining 71 244-98-98 raqamli ishonch telefoniga murojaat qilish tavsiya etildi.
