Anomal issiq tez yordam chaqiriqlarini keskin oshirmadi — SSV
Jazirama kuzatilgan so‘nggi to‘rt kun davomida respublika bo‘yicha 166 mingdan ortiq chaqiriq kelib tushgan.
Sog‘liqni saqlash vazirligi ma’lumotlariga ko‘ra, mamlakatda kuzatilayotgan anomal issiq ob-havo sharoitiga qaramay, tez tibbiy yordam xizmatiga kelib tushayotgan chaqiriqlar sonida keskin o‘sish qayd etilmadi.
Respublika tez tibbiy yordam markazi direktori Abduvoitjon G‘afurovning ma’lum qilishicha, issiq havoda yurak-qon tomir, nafas yo‘llari va qandli diabet kabi surunkali kasalliklarga chalinganlar, shuningdek, keksalar, homilador ayollar hamda bolalar xavf guruhiga kiradi. Shu bois mazkur toifadagi fuqarolar salomatligini muntazam nazorat qilish muhim ahamiyat kasb etadi.
Qayd etilishicha, anomal issiq kuzatilgan so‘nggi to‘rt kun davomida respublika bo‘yicha "103" xizmatiga jami 166 ming 726 ta chaqiriq kelib tushgan. Barcha murojaatlar belgilangan tartibda qabul qilinib, bemorlarga o‘z vaqtida tez tibbiy yordam ko‘rsatilgan.
Vazirlikka ko‘ra, 9–12-iyul kunlari bilan taqqoslaganda, jazirama davrida murojaatlar sonida sezilarli o‘sish kuzatilmagan. Bu holat aholiga ommaviy axborot vositalari va ijtimoiy tarmoqlar orqali issiq ob-havoda amal qilinishi lozim bo‘lgan ehtiyot choralari yuzasidan berilgan tavsiyalar samara bergani bilan izohlanmoqda.
Mutaxassislar fuqarolarga kunning eng issiq vaqtlarida zaruratsiz tashqariga chiqmaslik, yetarli miqdorda suv iste’mol qilish, yog‘li va sho‘r taomlarni cheklab, yengil hazm bo‘ladigan ovqatlarni iste’mol qilishni tavsiya etdi.
