Jizzaxda uch nafar voyaga yetmagan qiz hovuzda cho‘kib, vafot etdi
Holat yuzasidan tergovga qadar tekshiruv olib borilmoqda.
Jizzax viloyati Mirzacho‘l tumanida uch nafar voyaga yetmagan qizning sun’iy hovuzda cho‘kib vafot etgani yuzasidan tergovga qadar tekshiruv boshlandi. Bu haqda Bosh prokuratura axborot xizmati rahbari Hayot Shamsutdinovga tayanib, "Daryo" xabar berdi.
Qayd etilishicha, hodisa 17-iyul kuni soat 13:00 atrofida tumanning “Paxtazor” mahallasida joylashgan fermer xo‘jaligi hududida sodir bo‘lgan. Tomchilatib sug‘orish tizimi uchun qazilgan sun’iy hovuzga cho‘milish maqsadida tushgan uch nafar qiz cho‘kib ketgan. Ularning ikki nafari 17, yana biri esa 15 yoshda bo‘lgan.
Marhumalarning o‘lim sababini aniqlash maqsadida sud-tibbiy ekspertizasi tayinlangan. Dastlabki xulosaga ko‘ra, ularning o‘limiga yuqori nafas yo‘llarining suv bilan to‘silishi oqibatida yuzaga kelgan mexanik asfiksiya sabab bo‘lgan.
Hozirda mazkur holat yuzasidan Mirzacho‘l tumani prokuraturasi tomonidan tergovga qadar tekshiruv harakatlari olib borilmoqda.
So‘nggi oylarda respublikaning turli hududlarida suv havzalarida cho‘kish bilan bog‘liq fojiali hodisalar sodir bo'lmoqda. Xususan, Navoiy viloyatining Karmana tumanida Zarafshon daryosiga cho‘kib ketgan uch nafar fuqaroning jasadi qidiruv-qutqaruv ishlari davomida 10-iyul kuni topilgandi. Toshkentda Milliy gvardiya xodimi kanalda cho‘kayotgan ayolni qutqarishga urinib, halok bo‘lgandi. Samarqand viloyatining Oqdaryo tumanida 42 yoshli fuqaro Qoradaryo daryosiga tushib ketgani oqibatida bedarak yo‘qolgandi. Namanganda 18 yoshli, Buxoroda 17 yoshli yigitlar ham suvda cho‘kib, halok bo‘lgandi. Iyun oyi boshida Farg‘ona viloyatida esa fermer xo‘jaligidagi membranali suv havzasida ham bir kishi cho‘kish oqibatida vafot etgandi.
