Kichik tadbirkorlik subyektlarini tekshirishga uch yilga moratoriy joriy etildi

O‘zbekistonda kichik tadbirkorlik subyektlari faoliyatini tekshirishga uch yil muddatga moratoriy joriy etildi.

 

Bu haqda “O‘zbekiston Respublikasi Prezidentining tadbirkorlar bilan VI ochiq muloqotida belgilangan vazifalarni amalga oshirish chora-tadbirlari to‘g‘risida”gi Prezident farmonida (PF–175-son, 2026-yil 27-avgust) belgilangan.

 

Hujjatga ko‘ra, moratoriy davrida kichik tadbirkorlik subyektlari faoliyatini har qanday tekshirish noqonuniy hisoblanadi. Bunday qonunbuzarlikka yo‘l qo‘ygan mansabdor shaxslar belgilangan tartibda javobgarlikka tortiladi.

 

Moratoriy ayrim holatlarga tatbiq etilmaydi. Jumladan, jinoyat ishi doirasidagi, inson salomatligiga ta’sirini o‘rganish va mehnat qonunchiligiga rioya etilishini tekshirish, fuqarolar murojaatlari, qo‘shilgan qiymat solig‘ini qoplash (qaytarish), shuningdek, tadbirkorlik subyektini tugatish bilan bog‘liq tekshiruvlar bundan mustasno.

 

Shuningdek, moratoriy amal qiladigan davrda Biznes-ombudsman tomonidan “Samarali nazorat” tadbiri o‘tkaziladi.

 

Tadbir doirasida nazorat organlarining so‘nggi uch yil davomida o‘tkazgan tekshiruvlari joyiga chiqqan holda o‘rganiladi. Tekshiruvlar davomida aniqlangan qonunbuzilishlar yuzasidan tegishli choralar ko‘riladi.

 

Tekshiruv o‘tkazish tartibi buzilgani yoki noqonuniy tekshiruvlar aniqlangan hollarda esa tadbirkorlik subyektlarining buzilgan huquqlarini tiklash choralari ko‘riladi.