O‘zbek tili raqamli dunyoda ilm va texnologiya yaratiladigan til bo‘lishi lozim — Prezident
Prezident Shavkat Mirziyoyev ta’lim, texnologiya va sog‘liqni saqlashdagi islohotlar natijalari haqida so‘z yuritdi.
Prezident Shavkat Mirziyoyev O‘zbekiston davlat mustaqilligining 35-yilligiga bag‘ishlangan tantanali marosimda ta’lim, ilm-fan, texnologiya va sog‘liqni saqlash sohalaridagi o‘zgarishlarga to‘xtaldi.
Davlat rahbari mamlakatning dunyo hamjamiyatida munosib o‘rin egallashi uchun bilimli, kelajak kasblarini puxta egallagan va mustaqil fikrlaydigan mutaxassislar zarurligini ta’kidladi.
Qayd etilishicha, so‘nggi o‘n yilda aholi 8 millionga ko‘payganiga qaramay, maktabgacha ta’lim qamrovi 78 foizga yetkazilgan. Maktablarda esa 1,5 millionta qo‘shimcha o‘quvchi o‘rni yaratilgan.
Prezident, ijod va ixtisoslashtirilgan maktablar tashkil etilgani, yoshlar uchun xorijiy tillar va kasb-hunar o‘rganishga sharoitlar kengaytirilgani qayd etildi.
Oliy ta’limda ham qamrov kengayib, talabalar soni 1 million 600 ming nafarga yetgan. Talabalarning yarmidan ko‘pini xotin-qizlar tashkil etayotgani ta’kidlandi.
Shuningdek, ilm-fan, zamonaviy texnologiyalar va innovatsiyalar taraqqiyotning muhim omili sifatida qayd etildi. AT, sun’iy intellekt va kreativ iqtisodiyotni rivojlantirish doirasida 10 million yoshni raqamli industriya va kelajak kasblariga jalb etish maqsad qilingan.
Prezident Mustaqillik bayrami arafasida xitoylik hamkorlar bilan “Samarqand – 2028” sun’iy yo‘ldoshi fazoga uchirilganini ham alohida qayd etdi.
“Mening niyatim: O‘zbekiston texnologiya sohalarida jahonga ilg‘or tashabbuslarni taklif qiladigan markazga aylanishi zarur. O‘zbek tili raqamli dunyoda ilm va texnologiya yaratiladigan til bo‘lishi lozim", — dedi davlat rahbari.
Tantana davomida sog‘liqni saqlash tizimidagi o‘zgarishlar ham qayd etildi. Sohaga ajratilayotgan mablag‘ so‘nggi yillarda 8 karradan ziyod oshgani, mamlakatda 652 ta yangi tibbiyot muassasasi barpo etilgani aytildi.
Natijada tibbiy xizmatlar hajmi uch baravar oshgan. Ilgari xorijda amalga oshirilgan 100 dan ziyod murakkab diagnostika va davolash usullari bugun O‘zbekistonda ham bajarilayotgani ta’kidlandi.
Prezident aholining o‘rtacha umr ko‘rish davomiyligi 1991-yildagi 66,4 yoshdan 2025-yilda 75,4 yoshga yetgani, go‘daklar va onalar o‘limi ko‘rsatkichi esa to‘rt barobar kamayganini ma’lum qildi.
Shuningdek, O‘zbekistonda Islom sivilizatsiyasi markazi, Imom Buxoriy va Burhoniddin Marg‘inoniy yodgorlik majmualari kabi ilmiy-ma’rifiy maskanlar barpo etilgani qayd etilib, bu yo‘nalishdagi bunyodkorlik ishlari davom ettirilishi ta’kidlandi.
