Toshkentda yo‘l haqi oshadi: yangi tariflar maʼlum qilindi
1 oktyabrdan jamoat transportida yo‘l haqi 47 foizga oshadi.
1-oktyabrdan boshlab Toshkent shahrida avtobus va metroda yo‘l haqi tariflari o‘zgaradi. Karta yoki onlayn to‘lov uchun amaldagi 1 700 so‘mlik tarif 2 500 so‘mga oshiriladi. Naqd puldagi yo‘l haqi esa 3 000 so‘m bo‘lib qoladi.
Xalq deputatlari Toshkent shahar Kengashining 25-sentyabrda qabul qilingan qarorida poytaxt jamoat transportida yo‘lkira tariflari belgilangan.
Qarorga ko‘ra, transport kartalaridan foydalanuvchilar uchun imtiyozli va bepul tariflar saqlanib qoladi. Jumladan, yo‘lovchi ATTO kartasi orqali avtobusda yo‘l haqini to‘lab, 60 daqiqa ichida boshqa yo‘nalishga o‘tsa, ikkinchi qatnov uchun 1 500 so‘m to‘laydi. Uchinchi va to‘rtinchi qatnovlar esa shu vaqt oralig‘ida bepul bo‘ladi.
Bir soatlik tarif doirasida metrodan bir marta foydalanish mumkin. Metrodan ikkinchi marta foydalanilganda, 60 daqiqalik hisob davri qaytadan boshlanadi.
Shuningdek, qatnovlar soniga qarab transport kartalari uchun kunlik va oylik tariflar ham belgilangan. Avtobusda bir kunlik tarif 11 500 so‘m, 30 kunlik tarif 250 ming so‘mni tashkil etadi. Metro uchun kunlik tarif 13 500 so‘m, oylik tarif esa 345 ming so‘m etib belgilangan.
