AQSH Kongressi aʼzolari Ukrainaga qo‘shimcha 12 milliard dollar yordam ajratilishiga rozi bo‘ldi. Bu haqda Reuters agentligi xabar berdi.
3 sentyabr kuni Jozef Bayden Kiyev uchun yangi yordam paketini ajratilishini so‘rab Kongressga murojaat qilgandi. Bu mablag‘ 2023 moliyaviy yilining birinchi choragida taqdim etiladi. Oq uy maʼlumotlariga ko‘ra, moliyaviy yordam yangi qurollar sotib olish va Ukraina iqtisodiyotini qo‘llab-quvvatlash uchun sarflanadi.
Reuters‘ning qo‘shimcha qilishicha, kongressmenlar 1 oktyabrga qadar bu bo‘yicha qonun loyihasini ko‘rib chiqadi.
19 sentyabr kuni Ukraina byudjetiga Jahon banki maqsadli fondi orqali Vashington 1.5 milliard dollar taqdim etgandi. Ushbu dastur doirasida Kiyev jami 4.5 milliard dollar oldi. AQSH hukumati 24 fevraldan buyon ukrainaliklarga 18 milliard dollar ajratgan.
Avvalroq Vashington Ukraina fuqarolari xavfsizligini taʼminlash uchun 457 million dollar taqdim etgandi.