AQSH prezidenti Jo Bayden yong‘inlarda kamida 93 kishi halok bo‘lgan Maui oroliga tashrif buyurishi mumkinligini aytdi.
“Biz buni ko‘rib chiqyapmiz”, – deya javob berdi Amerika rahbari jurnalistning Mauiga safari ehtimoli haqidagi savoliga. Bayden dam olish kunlarini Delaver shtatidagi Rexobot-Bichda o‘tkazmoqda. Ofat zonasiga qachon borishi esa hozircha nomaʼlum.
Gavayi gubernatori Jon Grin shanba kuni oroldagi yong‘inlar Qo‘shma Shtatlardagi eng halokatli yong‘inga aylanganini aytdi. Mauida o‘rmon yong‘inlari 9 avgust kuni boshlangan edi. Kuchli shamol tufayli yong‘in tezda Laxayna sayyohlik shaharchasiga o‘tgan.
AQSH Favqulodda vaziyatlarni boshqarish federal agentligi hisob-kitoblariga ko‘ra, oroldagi yong‘inlardan keyin tiklash ishlari taxminan 5,52 milliard dollarga tushadi.
AQSH Kongressi Vakillar palatasi aʼzosi Marjori Teylor-Grin avvalroq Vashington maʼmuriyati Gavayini qo‘llab-quvvatlash zarurligini unutib, Ukrainaga harbiy yordam uchun katta mablag‘ ajratilayotganini tanqid qilgan edi.