Билимли одамлар нега кўпроқ яшайди?

Замонавий дунёда таълим нафақат муваффақият калити, балки инсон саломатлиги ва умр кўриш давомийлигига ҳам бевосита таъсир қилиши аниқланди. Вашингтон университетининг Соғлиқни баҳолаш ва таҳлил институти (IHME) тадқиқотчилари томонидан олиб борилган янги тадқиқот натижалари шуни кўрсатдики, таълим даражаси инсон умрининг давомийлигига кучли таъсир ўтказади.

 

АҚШда таълим даражасига кўра умр кўриш давомийлигидаги фарқ охирги йигирма йил ичида сезиларли даражада ошган. 2019 йилда олий маълумотли одамлар ўрта маълумотга эга бўлмаганларга қараганда ўртача 11 йил кўпроқ яшаган. Бу фарқ 2000 йилда 8 йилни ташкил этган эди.

 

Тадқиқот натижалари шуни кўрсатдики, олий маълумотга эга одамларнинг умр давомийлиги 2,5 йилга ошиб, 84,2 йилни ташкил этди. Коллеж таълимини тугатганлар эса 82,1 йил яшаб, умр давомийлигини 0,7 йилга узайтирган. Ўрта мактаб битирувчилари ўртача умр кўриш давомийлигини бор-йўғи 0,3 йилга оширган ҳолда 77,3 йилга етказган. Энг паст таълим даражасига эга бўлганлар (ўрта маълумотга эга бўлмаганлар) орасида эса бу кўрсаткич умуман ўзгармаган ва ўртача 73,5 йил бўлиб қолган.

 

“Таълим АҚШда юқори маошли ва иш топиш хавфини камайтириш имкониятини оширади. Бу эса соғлом турмуш тарзини олиб бориш ва сифатли тиббий хизматдан фойдаланишга ёрдам беради”, дейди мутахассислар.

 

Комила Одилова тайёрлади