Ҳиндистонда Арнаб циклони: қурбонлар бор
Мамлакатнинг шарқий соҳилида циклон ортидан электр таъминотида узилишлар кузатилмоқда.
Ҳиндистоннинг Андхра-Прадеш штатида Арнаб циклони оқибатида камида олти киши ҳалок бўлди. Пайшанба куни ҳам мамлакатнинг шарқий соҳилидаги айрим ҳудудларда электр таъминоти тикланмаган. Бу ҳақда Reuters хабар берди.
The Times of India газетаси маҳаллий расмийларга таяниб, қурбонлар сони тўққиз нафарга етганини ёзди. Маълумотларга кўра, одамлар электр токи уриши, дарахтлар қулаши ва уйларнинг вайрон бўлиши оқибатида ҳалок бўлган. Бироқ штат ҳукумати расмий қурбонлар сонини олти киши деб кўрсатган.
Ҳиндистон метеорология департаменти Арнаб циклонини «жуда кучли тропик циклон» тоифасига киритган. У чоршанба куни эрта тонгда Андхра-Прадеш соҳилларига етиб келган.
Штат бош вазирининг баёнотига кўра, циклон камида 15 мингта электр устунига зарар етказган. Конасеэм ва Ғарбий Годавари туманларидан ташқари, аксарият ҳудудларда электр таъминоти қайта тикланган.
Вазир технологиялар ёрдамида циклон энг катта зарар етказиши мумкин бўлган ҳудудлар олдиндан аниқланганини ва шу орқали инсонлар ҳаёти ҳамда мол-мулкига етадиган зарарни камайтириш имкони бўлганини таъкидлади.
Табиий офат яқинлашишидан олдин Андхра-Прадеш ва Одиша штатларида 180 мингдан ортиқ киши хавфсиз ҳудудларга кўчирилган. Айрим мактаблар ёпилган, баъзи поезд ва авиарейслар бекор қилинган.
Шунингдек, Андхра-Прадеш соҳиллари яқинида Маршалл ороллари байроғи остида сузувчи, 20 нафар экипаж аъзоси бўлган юк кемаси саёзликка келиб қолган. Денгиздаги ноқулай об-ҳаво сабабли кема пайшанба куни ҳам ўша жойда қолган.
