Рамазон қачон бошланади? Қирғизистон ва Қозоғистон дастлабки санани эълон қилди
Саналар янги ойнинг кўринишига қараб бир кунга олдинга ёки кейинга сурилиши мумкин.
Қирғизистон ва Қозоғистон мусулмонлари диний идоралари 2027 йилги Рамазон ойининг бошланиш санаси бўйича дастлабки маълумотларни эълон қилди. Унга кўра, ҳар икки мамлакатда рўза 8 февралда бошланиши кутилмоқда.
Қозоғистон мусулмонлари диний бошқармаси тасдиқлаган тақвимга кўра, Рамазон ҳайити 9 март куни нишонланади. Қадр кечаси 5 мартдан 6 мартга ўтар кечага тўғри келиши кутилмоқда. Қурбон ҳайити эса 16–18 май кунларига белгиланган.
Қирғизистон муфтияти ҳам Рамазон ойининг 8 февралда бошланишини прогноз қилган. Бироқ мамлакатда рўза бошланадиган якуний сана ой яқинлашганда эълон қилинади. Бу ҳақда 24.kg нашри хабар берди.
Диний идоралар маълумотларига кўра, ҳижрий ойларнинг бошланиш саналари астрономик ҳисоб-китоблар асосида аниқланади. Шу билан бирга, янги ойнинг кўринишига қараб диний саналар бир кунга олдинга ёки кейинга сурилиши мумкин.
Қайд этилишича, сўнгги етти йил давомида Қирғизистон ва Қозоғистонда Рамазон ойининг бошланиш саналари бир-бирига мос келган.
