Тошкентда иситиш тизими қачон ёқилади? — ҳокимлик изоҳ берди
Ҳокимлик иситиш тизимларини ишга туширишда амалдаги об-ҳаво шароити ҳам ҳисобга олинишини маълум қилди.
Тошкент шаҳар ҳокимлиги иситиш мавсуми қачон бошланишига изоҳ берди. Белгиланган тартибга кўра, иситиш тизимларини ишга тушириш учун ўртача суткалик ҳаво ҳарорати кетма-кет беш кун давомида +8 даражадан паст бўлиши керак.
Ҳокимлик аҳоли ҳаво совиши билан хонадонларда ҳарорат пасайиши ва иситиш мавсуми бошланишини кутаётганини тушунишини билдирган.
Шунингдек, иситиш тизимларини ишга туширишда нафақат белгиланган ҳарорат мезони, балки амалдаги об-ҳаво шароити ҳам ҳисобга олиниши таъкидланди. Ҳаво кескин совиб кетган тақдирда, тегишли қарор қабул қилиш кечиктирилмайди.
Айни пайтда Тошкент шаҳар ҳокимлиги иссиқлик тизимларининг мавсумга тайёрлигини назорат қилмоқда. Тайёрлов ишлари шаҳар хизматлари ва “Веолиа Энергй Ташкент” мутахассислари билан ҳамкорликда олиб борилмоқда.
Иситиш тизимларини ишга тушириш санаси ҳақида қўшимча маълумот берилиши билдирилган.
