Биржага чиқариладиган бензин ҳажми оширилади
Бу ҳақида Энергетика вазирлиги маълум қилди.
Айтилишича, совуқ ҳаво оқими натижасида айрим ҳудудлардаги автомобилларга газ тўлдириш компрессор шохобчалари (газ заправкалар) фаолиятига киритилаётган қисқа муддатли чеклов муносабати билан биржа савдоларига чиқарилаётган автобензин ҳажми вақтинчалик икки карра оширилади.
Маълум қилинишича, бунинг учун барча ҳудудларда зарур миқдорда захиралар яратилган.
"Талаб ва таклифга қараб биржа савдоларига жойлаштирилаётган автобензин ҳажмини янада ошириш имконияти мавжудлиги маълум қилинади.
Истеъмолчиларнинг автобензинга бўлган талабини тўлиқ қондириш масаласи давлат назоратига олинган", — дейилади хабарда.
Энергетика вазирлиги хусусий автозаправкалар эгаларидан нархларни сунъий равишда оширмасликлари, автобензинни сифат ва миқдор жиҳатидан тўғри сотишларини сўраган.
Бироқ биржага чиқариладиган бензин ҳажмининг таркиби (80, 91/92,95) ва пропан ҳажми оширилиши ҳақида айтилмаган.
