Давлат хизматчиларининг малакасини ошириш бўйича янги тартиблар белгиланди
Тайёрлов ва малака ошириш давлат ҳамда нодавлат таълим ташкилотлари томонидан олиб борилади.
Президент Фармонига асосан, Ўзбекистонда давлат фуқаролик хизматчиларини қайта тайёрлаш ва уларнинг малакасини оширишга оид аниқ талаб ва механизмлар жорий этилди. Эндиликда бу жараёнлар хизматдан ажралган ёки ажралмаган ҳолда амалга оширилади.
Хизматдан ажралган ҳолда малака ошираётган давлат хизматчиларининг иш жойи, лавозими ва ўртача иш ҳақи сақланади. Шунингдек, транспорт, яшаш ва кунлик харажатлари ҳам давлат органлари томонидан қопланади. Бу ҳолат давлат хизматчилари учун қулай шарт-шароитлар яратишга хизмат қилади.
Тайёрлов ва малака ошириш давлат ҳамда нодавлат таълим ташкилотлари томонидан олиб борилади. Бу жараёнлар бир неча манбалар, жумладан, давлат бюджети, халқаро молия институтлари грантлари, шунингдек, хизматчиларнинг ўз маблағлари ҳисобидан ҳам молиялаштирилиши мумкин.
Олий таълим, фан ва инновациялар вазирлиги эса давлат органларидаги фуқаролик хизматчиларининг қайта тайёрланиши ва малака оширишига оид давлат таълим талабларини ишлаб чиқади ва тасдиқлайди. Бу эса малака ошириш тизимини ягона стандарт асосида олиб боришни таъминлайди.
