Hindistonning Noida shahri polisiyasi kecha, 3 mart kuni Marion Biotech farmasevtika kompaniyasining 3 nafar yuqori lavozimli xodimini hibsga oldi. Hibsga olinganlar qalbaki dori-darmonlar ishlab chiqarish va sotishda ayblangan bo‘lib, ular O‘zbekistonda bir necha bolaning o‘limiga sabab bo‘lgan yo‘talga qarshi siropi ishlab chiqaruvchi farmasevtika firmasiga aloqador bo‘lgan. Bu haqda ABP Network nashri xabar berdi.
Qayd etilishicha, tergov O‘zbekistonda shirkat dori-darmonlari tufayli 18 nafar bolaning o‘limi haqidagi xabarlar paydo bo‘lganidan keyin boshlangan. Mazkur ish bo‘yicha ayblangan besh kishidan uchtasi hibsga olingan. Ayblanuvchilar orasida Marion Biotech kompaniyasining ikki direktori, kimyogar va operasiyalar bo‘limi boshlig‘i bor.
Nashr bergan ma’lumotga ko‘ra, mazkur sirop tufayli 2022 yilda Gambiya, Indoneziya va O‘zbekistonda 300 nafardan ortiq, ularning aksariyati besh yoshgacha bo‘lgan bolalar o‘tkir buyrak jarohati tufayli vafot etgan.