Amerikada tug‘ilib, umrining katta qismini Ispaniyada o‘tkazgan dunyoning eng keksa insoni – Mariya Branyas Morera 117 yoshida vafot etdi. Olimlar uning organizmini o‘rganish jarayonida g‘ayrioddiy genetika sirlarini kashf etishdi.
Genetik tadqiqotlar shuni ko‘rsatdiki, Mariyaning irsiy genlari hujayralarining yoshini biologik yoshi bilan solishtirganda 17 yilga yoshroq his qilishiga yordam bergan. Bundan tashqari, uning ichak mikrobiotasi yangi tug‘ilgan chaqaloqlarnikiga o‘xshash bo‘lib chiqqan. Ushbu tadqiqot Barselona universiteti genetika professori Manel Esteller boshchiligida olib borilgan.
Tadqiqotchilarning ta’kidlashicha, Mariya Branyas umrining oxirigacha aql-idrokini saqlab qolgan. Uning sog‘lig‘iga bog‘liq asosiy muammolar faqat bo‘g‘im og‘riqlari va eshitish qobiliyatining yo‘qolishi bilan cheklangan.
Mariya sog‘lom turmush tarziga amal qilgan:
U har kuni uch mahal yogurt iste’mol qilgan va asosan o‘simlik mahsulotlaridan iborat bo‘lgan o‘rtayer dengizi (sredizemnomorye) dietasiga rioya qilgan. Spirtli ichimlik va tamakidan butunlay tiyilgan. Sayr qilishni yaxshi ko‘rgan va doimo oilasi hamda yaqinlari qurshovida bo‘lishga intilgan.
Genetik tadqiqot natijalari kelajakda qarilik bilan bog‘liq kasalliklarni davolash va umrni uzaytirish usullarini ishlab chiqishda muhim o‘rin tutishi mumkin. Manel Esteller boshchiligidagi jamoaning ushbu ishi dunyo bo‘yicha 110 yoshdan oshgan insonlarning umr siri bo‘yicha eng batafsil o‘rganilgan tadqiqotlardan biri bo‘ldi.
