Davlat xavfsizlik xizmati Farg‘ona viloyati bo‘yicha boshqarmasi va boshqa huquq-tartibot organlarining hamkorligida o‘tkazilgan tezkor tadbirlar natijasida korrupsion xatti-harakatlar bilan bog‘liq ikki holat aniqlanib, tegishli choralar ko‘rildi.
Birinchi holatda, Kadastr agentligining Farg‘ona viloyati Rishton tumani bo‘limi bosh inspektori fuqaroning yashash hududida qo‘shimcha yer maydonini o‘zboshimchalik bilan egallagani va qurilish qilgani bois 84 million so‘m miqdorida jarima qo‘llanishi mumkinligini bildirgan. Shundan so‘ng, u jarima qo‘llamaslik va yer hujjatlarini qonuniylashtirib berish evaziga fuqarodan 400 AQSh dollari talab qilgan. Tezkor tadbir davomida bosh inspektor talab qilingan pul mablag‘ini xizmat joyi binosi oldida olayotgan vaqtida ashyoviy dalillar bilan ushlandi.
Ikkinchi holatda qurilish faoliyati bilan shug‘ullanuvchi xususiy korxona 2025-yil oktabr oyida “Farg‘ona suv qurilish invest” davlat muassasasining ma’muriy binosini 850 million so‘mlik mukammal ta’mirlash bo‘yicha tanlovda g‘olib bo‘lgan. Biroq mazkur muassasaning bosh muhandisi va boshqa mas’ullar ta’mirlash ishlariga ruxsat berish evaziga korxona rahbaridan 5 500 AQSh dollari talab qilgan. Tezkor tadbir chog‘ida ular 5 ming dollarlik pul mablag‘ini olayotgan paytida qo‘lga olindi.
Hozirda mazkur holatlar yuzasidan Jinoyat kodeksining tegishli moddalari bo‘yicha jinoyat ishlari qo‘zg‘atilib, tergov harakatlari olib borilmoqda.