«Фиорентина» ҳужумчисига бир нечта топ клуб қизиқиш билдирган
Италиянинг «Фиорентина» жамоаси еткачиларидан бири Душан Влаҳович нима учун ёзги трансфер ойнасида бошқа клубга ўтмаганига изоҳ берди.
Сербиялик ҳужумчининг таъкидлашича, унга «Манчестер Сити», «Ювентус» ва «Милан» клубларидан ҳам таклифлар бўлган, лекин футболчи шу жамоада қолишни афзал билган.
“Мен барча таклифлардан воз кечиб «Фиорентина»да қолишни афзал билдим. Мен бу ерда ўзимни жуда ҳам эркин ҳис қиламан ва яна кўплаб голлар уришни хоҳлайман. Қолган барчаси ўз вақти билан ҳал бўлади”, — дейди футболчи.
Маълумот учун: Душан Италия А Сериясининг жорий мавсумида 4 ўйин ўтказиб, 3 та гол уришга муваффақ бўлди (2 таси пеналтидан).
Футболчининг «бинафшаранглилар» билан тузган шартномаси 2023 йилнинг ёзигача амал қилади. Ҳозирда унинг трансфер қиймати 40 миллион еврони ташкил этмоқда.
Эслатиб ўтамиз, бундан аввал Анчелотти Давид Луизни «Реал»га таклиф қилгани ҳақида хабар берган эдик.
Мақсаджон Обиджонов
