Jizzax viloyati Zomin tumanining “Duoba” QFY hududida 11-iyun kuni qisqa muddatli kuchli yog‘ingarchilik oqibatida sel oqimlari kuzatildi. Bu haqda viloyat FVB matbuot xizmati xabar berdi.
Qayd etilishicha, “Usmonlisoy”, “Suvlisoy” va “Sarkamar” qishloqlaridan o‘tgan ariq suvlari toshib, yondosh hududda joylashgan ayrim aholi yashash uylarining hovlisiga, ekin maydonlariga suv kirgan.
Mazkur vaziyat bo‘yicha zudlik bilan Jizzax viloyati Favqulodda vaziyatlar boshqarmasi rahbariyati va qutqaruv bo‘linmalari hodisa joyiga yetib borgan. Hozirda qutqaruvchilar tomonidan suv oqimlarini xavfsiz o‘tkazib yuborilishini ta’minlash bo‘yicha barcha zarur chora-tadbirlar ko‘rilmoqda.
“Vaziyat to‘liq nazorat ostiga olingan. Hodisa oqibatida jabrlanganlar yo‘q”, — deyiladi xabarda.