O‘zbekiston Respublikasi Ichki ishlar vazirligi maʼlumotlariga ko‘ra, 2025-yilda mamlakat bo‘ylab qayd etilgan jinoyatlar soni o‘tgan yilga nisbatan sezilarli darajada kamaygan. Bu haqda IIV masʼullari ishtirokida o‘tkazilayotgan matbuot anjumanida Ichki ishlar vaziri o‘rinbosari, tergov departamenti boshlig‘i Ramazon Ashropov ma'lum qildi deya xabar qilmoqda Zamon.uz muxbiri.
Taʼkidlanishicha, 2024-yilda fuqarolar tomonidan 60 ta qotillik jinoyati sodir etilgan bo‘lsa, 2025-yilda mazkur ko‘rsatkich 31 taga tushgan. Shuningdek, yo‘l-transport hodisalari soni ham qisqargan: o‘tgan yili 9365 ta YTH qayd etilgan bo‘lsa, joriy yilda bu raqam 8738 tani tashkil etgan.
Biroq, umumiy ijobiy ko‘rsatkichlarga qaramay, ayrim toifadagi jinoyatlar soni oshgani ham qayd etildi. Xususan, nomusga tegish bilan bog‘liq jinoyatlar 2024-yilda 359 ta bo‘lgan bo‘lsa, 2025-yilda 381 taga yetgan. Bu esa o‘tgan yilga nisbatan taxminan 6 foizlik o‘sishni tashkil etadi.