Шавкат Мирзиёев Қосим-Жўмарт Тўқаевни табриклади
Қозоғистондаги референдумда қарийб 90 фоиз овоз билан янги Конституция лойиҳаси маъқулланди.
Ўзбекистон Республикаси Президенти Шавкат Мирзиёев 16 март куни Қозоғистон Республикаси Президенти Қосим-Жўмарт Тоқаев билан телефон орқали мулоқот қилиб, янги таҳрирдаги Конституция лойиҳаси бўйича референдум муваффақиятли ўтказилгани билан табриклади.
Маълумотларга кўра, янги таҳрирдаги конституция 90 фоиз овоз билан маъқулланган.
Евроосиё интеграцияси институтига кўра, янги Конституцияни қабул қилиш учун 86,7 фоиз овоз берилган.
“Сотсис-А” институти сўровида бу кўрсаткич 87,4 фоизни ташкил этмоқда. Ижтимоий сиёсат институтининг экзитпол натижалари эса респондентларнинг 88,6 фоизи янги Конституцияни қўллаб-қувватлаганини кўрсатган.
Шунингдек, Тўқаев янги Конституция қабул қилингани билан фуқароларни табриклади. У референдум ўтказилган 15 март санасини Конституция куни деб эълон қилди.
“Мен кўплаб мамлакатларнинг Конституциялари билан танишдим ва ишонч билан айта оламанки, асосий қонунимиз энг яхшилари қаторида туради”, — деди Тўқаев.
Қайд этилишича, референдум куни бутун мамлакат бўйлаб 10 388 та сайлов участкаси очилган. Қозоғистоннинг 54 та мамлакатдаги дипломатик ваколатхоналарида яна 71 та сайлов участкаси ташкил этилган.
