"Ozarbayjon Yevropaga nafaqat gaz, balki “yashil” energiya ham eksport qiladi", — dedi prezident Ilhom Aliyev Berlinda Germaniya kansleri Olaf Shols bilan uchrashuvda.
Ozarbayjon o‘zini Germaniya va Yevropaga gaz hamda qayta tiklanadigan energiya manbalari yetkazib beruvchisi sifatida taklif etmoqda.
Aliyevning so‘zlariga ko‘ra, Yevropaga yetkazib beriladigan gaz hajmi 2027 yilga borib 20 milliard kub metrga ko‘tariladi, Hozirda bu 12 milliard kub metr.
“Bundan tashqari, Ozarbayjon qayta tiklanadigan energiya manbalarining juda katta salohiyatiga ega. Faqat Kaspiy dengizining shamol energiyasi salohiyati 157 gigavattni tashkil etadi”, — dedi Prezident.
Olaf Shols, o‘z navbatida, Ozarbayjon bilan energetika sohasida yana-da faol hamkorlik qilishga chaqirdi.
“Mamlakat Germaniya va Yevropa energiya taʼminotini diversifikatsiya qilishga muhim hissa qo‘shish imkoniyatiga ega”, — dedi kansler.
Rossiyaning Ukrainaga harbiy bosqinidan so‘ng Yevropaning kamida o‘nta davlati Ozarbayjondan gaz yetkazib berishga qiziqish bildirgan. Hozirgacha asosiy xaridorlar Turkiya, Gruziya, Italiya va Gretsiya bo‘lgan. Tez orada gaz Ruminiya, Albaniya va Vengriyaga ham yetkazib berilishi kutilmoqda.
“Albatta, uzoq muddatli shartnomalar imzolanishi kerak”, — deya qo‘shimcha qildi Aliyev.