Ўзбекистонда жазони ўтаб чиққан шахсларни ишга олганларга субсидия берилади

 

Норматив-ҳуқуқий ҳужжатлар лойиҳалари муҳокамаси порталига «Аҳолининг ижтимоий муҳофазага муҳтож айрим тоифаларини қўллаб-қувватлаш ва уларнинг бандлигига кўмаклашиш бўйича қўшимча чора-тадбирлар тўғрисида»ги қонун лойиҳаси жойлаштирилди.

 

Унда қайд этилишича, 2023 йил 1 ноябрдан 2025 йил 1 январга қадар тадбиркорлик субъектларига ишга қабул қилинган жазони  ижро этиш муассасаларидан озод этилган ҳар бир шахс учун базавий ҳисоблаш миқдорининг 3 баравари миқдорида бир марталик субсидия ажратиш тартиби жорий этилади.

 

Бунда субсидия, ишга жойлаштирилган шахс иш жойида камида 3 ойдан ортиқ муддатда меҳнат фаолиятини давом эттиргандан сўнг тўланади. Шунингдек, Ички ишлар органлари томонидан фуқаро жазони ижро этиш муассасаларидан озод этилганлиги тўғрисидаги маълумотни меҳнат органларига тақдим этиб борилади.

 

Жазони ижро этиш муассасаларидан озод қилинган шахсларни касб-ҳунарга ўқитиш, уларга тадбиркорлик кўникмалари ва хорижий тилларни ўргатиш қуйидаги тартибда амалга оширилади:

 

• касб-ҳунар ва тадбиркорлик кўникмаларини ўргатишга оид махсус ўқув курслари Камбағалликни қисқартириш ва бандлик вазирлиги томонидан 2023 йил 1 ноябрдан бошлаб «Ишга марҳамат» мономарказлари, касб-ҳунарга ўқитиш марказларида ташкил этилади;
• хорижий тилларни ўргатиш ҳуқуқ-тартибот органларининг олий таълим муассасаларида Ички ишлар вазирлиги томонидан  2023 йил 1 ноябрдан бошлаб масофавий таълим шаклида ташкил этилади;
• Бунда, касб-ҳунар, тадбиркорлик кўникмалари ва хорижий тилларни ўргатиш харажатлари Камбағалликни қисқартириш ва бандлик вазирлигининг тегишли жамғармалари маблағлари ҳисобидан молиялаштирилади.