Ijtimoiy tarmoqlarda Qashqadaryo viloyatida haydovchi va YPX xodimi janjallashgani aks etgan video yuzasidan viloyat IIB Axborot xizmati munosabat bildirdi.
Maʼlum qilinishicha, joriy yilning 12 aprel kuni soat 17:40da fuqaro Q.M. Lacetti rusumli avtomobil vositasini spirtli ichimlik isteʼmol qilgan holda boshqarib, M-39 avtomobil yo‘lining Kitob-Shahrisabz yo‘nalishida boshqaruvni yo‘qotgan. Oqibatda qarama-qarshi tomondan kelayotgan “Hamkor” rusumli mototsikl bilan yo‘l-transport hodisasi sodir qilgan.
Shu vaqtda o‘z xizmat vazifasini bajarayotgan Shahrisabz shahar IIB JXX YHXB katta inspektori yo‘l-transport hodisasini protsessual rasmiylashtirish maqsadida haydovchini to‘xtatib, Q.M.ning spirtli ichimlikdan mastlik holatini aniqlash uchun "alkotester" tekshiruvidan o‘tkazmoqchi bo‘lgan. Haydovchi YPX inspektorining qonuniy talabiga bo‘ysunmasdan inspektorning xizmat faoliyatiga faol qarshilik ko‘rsatgan.
Xabarda qayd etilishicha, mazkur holat yuzasidan haydovchi Q.M.ga nisbatan Shahrisabz shahar prokuraturasi tomonidan JKning 219-moddasi bilan jinoyat ishi qo‘zg‘atilib, protsessual tartibda ushlangan va qamoq ehtiyot chorasi qo‘llanilgan. Hozirda dastlabki tergov harakatlari olib borilmoqda.