Roskomnadzor Rossiyada WhatsApp‘ni to‘liq bloklash bilan tahdid qildi. Bu haqida DW nashri xabar bermoqda.
“Ushbu messenjer mamlakat hududida terrorchilik harakatlarini uyushtirish va amalga oshirish, ularning ijrochilarini yollash, shuningdek, fuqarolarimizga nisbatan firibgarlik va boshqa jinoyatlar uchun foydalanilmoqda”, deyiladi idora bayonotida.
Roskomnadzor, shuningdek, WhatsApp Rossiya qonunchiligini buzishda davom etayotganini va shu sababli u mamlakatda to‘liq bloklanishi mumkinligini bildirdi.
28 noyabrda Rossiyadagi foydalanuvchilar WhatsApp‘da keng ko‘lamli nosozliklar yuz berayotganini xabar qilishdi. Avgust oyida Roskomnadzor ushbu messenjer orqali qo‘ng‘iroqlarni bloklagan edi. Shunga qaramay, WhatsApp‘dan Rossiyaning yuqori lavozimli amaldorlari, jumladan prezident yordamchisi Yuriy Ushakov ham faol foydalanishda davom etmoqda.