Bugun, 15 aprel — Madaniyat va sanʼat xodimlari kuni munosabati bilan Yunus Rajabiy nomidagi O‘zbek milliy musiqa sanʼati institutida “Sanʼatdan baxtini topganlar” shiori ostida bayram dasturi o‘tkazildi.
Dastur avvalida institut rektori Eldor Shermanov barcha madaniyat va sanʼat xodimlarini samimiy qutladi hamda o‘z minnatdorchiligini bildirib o‘tdi. Shuningdek, “Maʼnaviy go‘zallikning posbonlari” yaʼni madaniyat xodimlari madaniyat va sanʼat sohasida o‘zining fidokorona xizmatlari hamda ijodiy tashabbuslari bilan o‘rnak ko‘rsatgan bir qator professor-o‘qituvchilar hamda soha mutaxassislari institut rahbariyati tomonidan taqdirlandi.
Bayram munosabati bilan qiziqarli va interaktiv tarzda o‘tkazilgan “Zakovat” intellektual o‘yinida faxrli o‘rinni egallagan jamoa aʼzolari munosib taqdirlandi. Shundan so‘ng “Sanʼatdan baxtini topganlar” konsertning badiiy qismi boshlandi.
Dastur davomida “Katta ashula” “O‘zgacha”, “Kelib gulzorima”,“Duxtori xushro‘y”, “Ayrilmasun”, “Lazgi”, “Surxoncha” kabi milliy musiqa va kuy-qo‘shiqlari ijro etildi.