Сенат раиси Парламентлараро иттифоқ Раиси билан учрашди
Ўзбекистон ва Парламентлараро иттифоқ ўртасидаги ўзаро муносабатларни мустаҳкамлаш масалалари, шунингдек, ҳамкорликда ўтказиладиган тадбирларнинг ташкилий масалалари муҳокама қилинди.
Олий Мажлис Сенати Раиси Танзила Нарбаева Женева шаҳрида Парламентлараро иттифоқ (ПИ) Раиси Тулия Эксон билан учрашув ўтказди.
Ўтган қисқа муддат ичида Ўзбекистон Парламентлараро иттифоқнинг ажралмас қисмига айлангани, ҳамкорликда Бухоро шаҳрида Барқарор ривожланиш мақсадларига бағишланган Халқаро парламент форуми ҳамда Тошкент шаҳрида Парламентлараро иттифоққа аъзо давлатлар парламентлари аёл раҳбарлари 14-саммитининг муваффақиятли ўтказилгани бунга ёрқин мисол бўла олиши алоҳида таъкидланди.
Мамлакатимиз Президенти Шавкат Мирзиёевнинг ташаббуси билан келаси йили Парламентлараро иттифоқнинг 150-юбилей Ассамблеяси Ўзбекистонда ўтказилади.
Марказий Осиё минтақасида илк бор парламент йўналишидаги бундай кенг кўламли тадбирнинг ўтказилиши жаҳон ҳамжамияти томонидан Ўзбекистоннинг жаҳон сиёсати марказларидан бири сифатида эътироф этилаётганини тасдиқлайди.
Учрашувда мамлакатимизда 150-Ассамблеяни ҳамда унинг тегишли мажлисларини ташкил этиш ва ўтказиш билан боғлиқ масалаларга алоҳида эътибор қаратилди.
"Ўзбекистон ушбу Ассамблеяга мезбонлик қилаётганидан хурсандмиз, чунки айнан сизнинг мамлакатингиз бундай шарафга муносибдир. Мен Тошкентдаги юбилей Ассамблеяни ПИ ва бутун жаҳон парламентаризми тарихидаги унутилмас воқеага айлантириш учун бор кучимни ишга солишга тайёрман", — дея, таъкидлади Т.Эксон.
Шунингдек, 2025 йилда Тошкентда ўтказиладиган тадбир якунларига кўра Ташкилот бутун жаҳон парламент ҳаракатининг ўрта ва узоқ муддатли истиқболдаги устувор йўналишларини белгилаб берадиган тегишли ҳужжатни қабул қилишни режалаштираётганини маълум қилди.
