Suriya yangi milliy valyutani muomalaga kiritayotganini rasman eʼlon qildi. Bu haqda mamlakat Markaziy banki raisi Abdulqodir al-Hasriya maʼlum qildi, deb xabar beradi Anadolu agentligiga tayanib Lada.kz.
Markaziy bank rahbarining taʼkidlashicha, yangi valyutaning joriy etilishi mamlakat hayotidagi muhim milliy voqea bo‘lib, Suriyada yangi iqtisodiy hamda pul-kredit davri boshlanayotganini anglatadi. Uning so‘zlariga ko‘ra, mazkur tashabbus moliyaviy mustaqillikni mustahkamlash va iqtisodiy barqarorlikka erishish yo‘lidagi muhim qadam hisoblanadi.
Abdulqodir al-Hasriya ijtimoiy tarmoqdagi sahifasida yangi valyuta ozodlikdan keyingi davrda erishilgan moliyaviy mustaqillik ramzi ekanini qayd etdi. Unga ko‘ra, yangilangan pul birligi Suriya Markaziy banki rahbarligida amalga oshirilayotgan islohotlar natijasi bo‘lib, mamlakatning iqtisodiy tiklanish sari harakatini ifodalaydi.
Markaziy bank rahbari yangi valyuta tashqi iqtisodiy omillarga qaramlikni kamaytirishga, moliya tizimini barqarorlashtirishga hamda jamoatchilik ishonchini mustahkamlashga xizmat qilishiga umid bildirdi.
Yangi milliy valyutaga oid barcha tafsilotlar 2025 yil 28 dekabr kuni o‘tkazilishi rejalashtirilgan maxsus yig‘ilishda taqdim etiladi. Unda banknota dizayni, nominallari hamda valyutani muomalaga kiritish mexanizmlari rasman eʼlon qilinishi kutilmoqda.
Mutaxassislar ushbu tashabbusni Suriyaning uzoq davom etgan inqirozdan so‘ng iqtisodiy tiklanish yo‘lidagi muhim bosqich sifatida baholamoqda