АҚШ Россияга босимни кучайтирмоқда: Трамп 100 фоизгача бож тарифларини назарда тутувчи қонунни имзолади

АҚШ президенти Дональд Трамп Украинадаги уруш сабаб Россияга қарши кенг қамровли санкциялар пакетини назарда тутувчи қонунни имзолади. 

 

Жума куни имзоланган қонун Россия президенти Владимир Путин, юқори мартабали амалдорлар ва олигархлар, шунингдек, Россия банклари ва молия институтларига қарши санкцияларни назарда тутади.

 

Шунингдек, Москванинг энергетика ва мудофаа тармоқлари ҳамда Россия нефтини Ғарб санкцияларини четлаб ўтган ҳолда ташишда фойдаланилаётган танкерларнинг «соя флоти» ҳам чекловларга тушади.

 

Қонуннинг муҳим бандларидан бирига кўра, Трамп Россия нефти ва газининг бешта энг йирик харидорига 100 фоизгача бож тарифларини жорий этиш ваколатига эга бўлади. Ушбу чора Россия хом нефтининг энг йирик импортчилари бўлган Хитой ва Ҳиндистонга сезиларли таъсир кўрсатиши мумкин.

 

Қонун, шунингдек, Эроннинг энергетика ва қурол-яроғ тармоқларига қарши санкцияларни кенгайтиради.

 

Ҳужжат Сенатда ўтган ой, Вакиллар палатасида эса чоршанба куни маъқулланган. Вакиллар палатасида 58 нафар демократ қонун лойиҳасини қўллаб-қувватлаган.

 

Қонун тарафдорлари санкциялар Кремлнинг урушни молиялаштириш имкониятларини чеклаши ва Россияни музокараларга ундаши мумкинлигини таъкидламоқда. Украина президенти Вoлoдимир Зеленский ҳужжатни «ниҳоятда кучли восита» деб атаган.

 

Бироқ Вакиллар палатасидаги Демократик озчилик етакчиси Ҳаким Жефрайс қонунга қарши чиқди. Унинг таъкидлашича, янги тариф ваколатлари АҚШдаги оилалар харажатларини ошириши мумкин. У санкциялар билан боғлиқ қоидаларда «кўплаб бўшлиқлар» мавжудлигини ҳам билдирган.

 

Ҳиндистон эса янги тарифлар таҳдидига қарамай, 1,4 миллиард аҳолиси учун энергия хавфсизлигини таъминлашга қатъий содиқлигини маълум қилган.

 

Трампнинг қонунни имзолаши Хитой президенти Си Цзиньпиннинг Оқ уйга ташрифидан тахминан бир ҳафта олдин содир бўлди.