Хорижга чиқиш тақиқини ечиб бериш ваъдаси: банк бош мутахассиси пора олаётганда ушланди
Ҳолат юзасидан Жиноят кодексининг 168-моддаси билан жиноят иши қўзғатилган.
Андижон вилоятида фуқаронинг хорижга чиқишига қўйилган тақиқни олиб ташлаб беришни ваъда қилган тижорат банки бош мутахассиси ушланди.
Бош прокуратура ҳузуридаги Департаментнинг Андижон вилояти бошқармаси ва бошқа ҳуқуқни муҳофаза қилувчи органлар ходимлари ҳамкорлигида ўтказилган тезкор тадбирда тижорат банкининг Андижон ҳудудий бошқармаси бош мутахассиси Б.У. қўлга олинган.
Қайд этилишича, у фуқаро А.А.нинг банк кредити бўйича қарздорлиги сабаб Мажбурий ижро бюроси томонидан қўйилган хорижга чиқиш тақиқини олиб ташлаб бериш эвазига 5,5 млн сўм олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилган. Ҳозирда тергов ҳаракатлари олиб борилмоқда.
