Исроил зарбалари: Ғазода камида уч киши ҳалок бўлди

Ғазо секторида шанба куни Исроил томонидан амалга оширилган ҳаво зарбалари оқибатида камида уч нафар фаластинлик ҳалок бўлди. Бу ҳақда тиббиёт ходимларига таяниб, Reuters хабар берди.

 

Шимолий Ғазодаги Жабалия қочқинлар лагери яқинига берилган зарбалардан бирида Ғазо Соғлиқни сақлаш вазирлиги бош директори Мунир ал-Буршнинг ўғли Басир ал-Бурш ҳалок бўлган.

 

Исроил ҳарбийлари зарба вақтида бир неча жангари, жумладан, Басир ал-Бурш нишонга олинганини билдирди. Ҳамас эса ҳозирча бу воқеа юзасидан изоҳ бермаган.

 

Reuters олган видеода Мунир ал-Бурш ўғлининг адёлга ўралган жасадини кўтариб, уни тез ёрдам машинасида шифохонага олиб бораётгани акс этган. Ал-Буршнинг айтишича, ўғли чодирдан ташқарига чиққанидан кейин зарбага учраган.

 

Маълумотларга кўра, Мунир ал-Бурш 2023 йил декабрида Исроилнинг ҳаво ҳужуми оқибатида қизидан айрилган. Ўша ҳужумда унинг ўзи ҳам яраланган.

 

Ғазо шаҳрининг шарқидаги Шужоия ҳудудига берилган яна бир зарба оқибатида бир киши ҳалок бўлган. Шаҳарнинг Шайх Радвон туманида автомобилга берилган зарба оқибатида яна бир киши ҳалок бўлган. Исроил ҳарбийлари ушбу зарба Ҳамас жангарисига қаратилганини маълум қилди.

 

Фаластин расмийларига кўра, 2023 йил октябрида Ҳамас бошчилигидаги жангарилар Исроил жанубида қарийб 1 200 кишини ўлдирганидан сўнг бошланган Исроилнинг Ғазодаги ҳарбий амалиётлари оқибатида 73 мингдан ортиқ киши ҳалок бўлган.

 

Ўтган йили АҚШ воситачилигида келишилган сулҳ Ғазо секторини келгусида қайта тиклашни назарда тутади. Бироқ Ҳамасни қуролсизлантириш ва Исроил қўшинларини ҳудуддан олиб чиқиш масалаларида келишувга эришилмагани сабабли бу борада сезиларли силжиш кузатилмаган.