Bosh prokuratura huzuridagi Departamentning hududiy bo‘limlari tomonidan o’tkazilgan tekshiruvlarda kredit mablag‘laridan maqsadsiz foydalanish holatlari aniqlangan.
Jumladan, Guliston shahrida “M.K” MChJ rahbari va boshqalar oldindan til biriktirib, tashkilotga tibbiy xizmat ko‘rsatish sohasini rivojlantirish uchun ajratilgan 7 mlrd kredit mablag‘ining 3,5 mlrd so‘mini maqsadsiz safrlab, talon-taroj qilgan.
Termiz shahrida esa fuqaro “T. Q” MChJga norasmiy rahbarlik qilib, tashkilotga non mahsulotlarini ishlab chiqaruvchi vositalarni sotib olish uchun ajratilgan 500 mln so‘m kredit pulini maqsadsiz sarflab yuborgan. Shuningdek, u kredit ta’minoti sifatida garovga qo‘yilgan binoni qonunga xilof ravishda tasarruf etib olgan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-taroj qilish) va 233-moddasi (band solingan mulkni qonunga xilof ravishda tasarruf etish) bilan ish qo‘zg‘atilgan.