Тошкентда янги типдаги мактаблар қурилади: ўқувчи сиғими икки баравар оширилади
Сергелидаги айрим мактаблар қувватидан икки баравар юқори юкламада ишламоқда. Муаммони ҳал этиш учун янги мактабларда спорт зали ва ошхона ертўлага жойлаштирилади.
Президент Шавкат Мирзиёев иштирокидаги йиғилишда Тошкент шаҳрининг Сергели туманидаги айрим мактаблар ўз қувватига нисбатан 1,5–2 баравар кўп ўқувчига хизмат қилаётгани қайд этилди. Муаммони ҳал этиш мақсадида ўқувчи сиғимини икки баравар ошириш имконини берадиган янги типдаги мактаблар қуриш лойиҳаси таклиф қилинди.
Лойиҳага кўра, мактабларнинг спорт зали, ошхона ва устахоналари ертўла қисмида жойлаштирилади, юқори қаватлар эса тўлиқ синф хоналари сифатида фойдаланилади. Жорий йилда Тошкент шаҳрининг ҳар бир туманида биттадан мактаб ва биттадан боғчада ушбу ёндашув синов тариқасида жорий этилиб, “пойтахт тажрибаси” яратилади.
Шунингдек, пойтахтда аҳоли ва сайёҳлар учун қулай микроиқлим яратиш мақсадида 12 та сунъий кўл барпо этиш ишлари бошланиши маълум қилинди. Уларнинг учтаси Сергели туманидаги Қўшқўрғон, Султонобод ва Фароғатли маҳаллаларида жами 22 гектар майдонда ташкил этилади.
Мазкур кўллар пойтахт иқлимини мўтадиллаштириш, шунингдек, фуқаролар учун сайр ва дам олиш масканларини яратишга хизмат қилиши кўзда тутилган.
Бундан ташқари, “Жўн” каналининг Сергели ва Янгиҳаёт туманлари ҳудудидан ўтувчи 5 километрлик қисмини бетонлаштириш ишлари бошланган. Туман ҳокимларига йил якунига қадар канал бўйида сайилгоҳ ҳамда саломатлик йўлакларини барпо этиш вазифаси юклатилди.
Шунингдек, Чирчиқ дарёсининг Тошкент шаҳри ҳудудидан ўтувчи 16 километрлик қисмида ўзанни мустаҳкамлаш ишлари бошланади. Лойиҳа доирасида қўшимча 300 гектар майдонда “яшил белбоғ”, сайилгоҳлар, пиёдалар ва велосипед йўлаклари барпо этилиши режалаштирилган.
