“Ягона QR-код бошқа тўлов усулларини бекор қилмайди”: Солиқ қўмитаси тушунтириш берди
Қўмита тадбиркорлар бошқа тўлов ташкилотларининг QR-кодларидан фойдаланишда давом этиши мумкинлигини, солиқ органлари эса бунга аралашиш ваколатига эга эмаслигини таъкидлади.
2026 йил 1 июлдан бошлаб савдо ва хизмат кўрсатиш соҳасидаги барча юридик шахслар учун ягона QR-кодли тўлов тизими орқали тўловларни қабул қилиш тартиби кучга кирган эди. Бироқ бу тўловлар фақат ягона QR-код орқали амалга оширилиши керак дегани эмас, дея маълум қилмоқда Солиқ қўмитаси.
Қайд этилишича, ягона QR-код харидорлар учун мавжуд тўлов усулларига қўшимча имконият сифатида жорий этилган. Шу сабабли тадбиркорлар ўз ихтиёрига кўра Давлат реестрига киритилган тўлов ташкилотларининг QR-кодлари, банк карталари, нақд пул ҳамда қонунчиликда назарда тутилган бошқа тўлов усулларидан ҳам фойдаланишда давом этиши мумкин.
Расмий муносабатда Солиқ қўмитаси ҳисоб-китобларни амалга ошириш тартибини белгиловчи ваколатли орган эмаслигини ҳам алоҳида таъкидланди.
Шунингдек, Солиқ қўмитаси солиқ органлари томонидан тадбиркорларни бошқа тўлов ташкилотларининг QR-кодларини олиб ташлашга мажбурлаш ёки бу жараёнга аралашишга йўл қўйилмаслигини билдирди.
Агар солиқ ходимлари томонидан бундай ноқонуний ҳолатлар кузатилса, тадбиркорларга Солиқ қўмитасининг 71 244-98-98 рақамли ишонч телефонига мурожаат қилиш тавсия этилди.
