"Толибон" ўзининг ашаддий душманларидан бирини ҳукуматга таклиф қилди.
Бу ҳақда Эрондаги музокараларда маълум қилинган.
“Толибон” машҳур қўмондон Исмоил Хонни ҳукуматга таклиф қилди. Бу ҳақда “Sputnik Афганистан” хабар берди.
Маълумотларга кўра, Афғонистон ташқи ишлар вазири вазифасини бажарувчи Амирхон Мутаққий бу ҳақда Теҳрондаги музокаралар вақтида маълум қилган. У Исмоил Хон ва Эрон ташқи ишлар вазири Амир Абдуллахиян билан музокаралар пайтида бош вазир Муҳаммад Ҳасан Оҳундзоданинг таклифини етказган. Мулла Оҳунд 20 нафар йирик ҳарбий етакчилар ва давлат арбобларини “Толибон” томонидан тузиладиган инклюзив ҳукумат таркибига киришга таклиф қилган. Ўз навбатида Исмоил Хон 25 мартга қадар вақт сўраган. Шу билан ҳозирда Эрон ТИВ ва толиблар томонидан бу ҳақда расмий маълумот берилмади.
Маълумот ўрнида: Исмоил Хон – машҳур афғонистонлик қўмондон. У аввал совет қўшинларига, сўнгра “Толибон”га қарши курашган. “Ҳирот шери” номи билан машҳур. 2021 йил август ойида у толиблар томонидан асирга олинган бўлса-да, кейинчалик Эронга чиқиб кетган.
Аввалроқ Покистон Афғонистон билан чегарада тўсиқлар қўйишни давом эттиришини маълум қилганди.
Жаҳонгир Қўзиев
