Тошкентда ота фарзандига алимент эвазига уй берди
Шу тариқа ижро ҳужжати амалда тамомланган.
Тошкент шаҳрининг Чилонзор туманида ота 2036 йилгача бўлган алимент миқдори эвазига 2 хонали хонадон ҳадя қилди. Бу ҳақида МИБ ахборот хизмати хабар бермоқда.
Қайд этилишича, Мажбурий ижро бюросининг Чилонзор тумани бўлими иш юритувига фуқаролик ишлари бўйича Учтепа туманлараро судининг ижро варақасига асосан, қарздор М.Б.дан ундирувчи Р.С.нинг фойдасига 1/4 қисм миқдорида алимент ундириш тўғрисидаги ижро ҳужжати мавжуд.
Қарздор эркак, 2023 йилнинг ноябрь ойига қадар бир нафар вояга етмаган фарзандининг моддий таъминоти учун алимент пулларини ўз вақтида тўлаб келган. Бироқ, 2023 йилнинг декабрь ойидан 2025 йилнинг октябрь ойига қадар алимент пулларини тўламагани оқибатида катта миқдордаги қарздорлик вужудга келган.
Шундан сўнг, Бюронинг туман бўлими давлат ижрочиси С.Жўраев томонидан 16.10.2025 йилда қарздорга тегишли бўлган мол-мулкларни аниқлаш мақсадида, “MIB Portal” электрон дастури орқали тегишли ташкилотларга сўровномалар юборилиб, қарздорга тегишли бўлган 2 та автотранспорт воситаси аниқланган ва тегишли тартибда банд солинган.
Бундан ташқари, қарздор отага нисбатан 17.10.2025 йилда “Суд ҳужжатлари ва бошқа органлар ҳужжатларини ижро этиш тўғрисида”ги Қонуннинг 421-моддаси билан Ўзбекистон Республикаси ҳудудидан чиқишини вақтинча чеклаш тўғрисида қарор қабул қилиниб, тақиқ қўйилган.
Ижро ҳаракатлари давомида, қарздорнинг алимент тўловидан бўлган қарздорлиги Ўзбекистон Республикаси Оила кодексининг 99,140-моддаларига асосан ҳисобланганда жорий йилнинг 10.11.2025 кунига қадар жами 40.000.000 сўмни ташкил этган.
Мажбурий ижро ҳаракатлари давомида, 10.11.2025 йилда қарздор ота бир нафар вояга етмаган фарзанди учун 2036 йилгача бўлган миқдор эвазига 2 хонали хонадон ҳадя қилди. Мазкур ижро ҳужжати амалда тамомланди.
