Andijon viloyati Baliqchi tumanida to‘y sabab kuyov jarimaga tortildi. Bu haqida Majburiy ijro byurosining Andijon viloyati boshqarmasi ma’lum qildi.
Xabar berilishicha, Baliqchi tumanida yashovchi 22 yoshli fuqaroning to‘yi munosabati bilan to‘y korteji Baliqchi tuman markazida guruh bo‘lib harakatlangan. Bu holatni avtomashinadan tanasini chiqarib, video tasvirga olib ketayotgan operator avtomashinasi viloyat IIB YHXB haydovchi operatori tomonidan to‘xtatilib, unga nisbatan qonuniy chora ko‘rilishi bildirilgan.
Shundan so‘ng, kuyov va uning do‘stlari bu holatga qarshilik ko‘rsatib, xizmat vazifasini o‘tayotgan xodim bilan janjallashib, unga tan jarohati yetkazishgan.
Hozirda mazkur holat jinoyat ishlari bo‘yicha Baliqchi tuman sudida ko‘rib chiqilib, huquqbuzarlarga nisbatan 27 mln 200 ming so‘m miqdorida jarima jazosi qo‘llanilgan. Shuningdek, ushbu jarima pullari undirilgan.